ئێمە لە تۆرە کۆمەڵایەتیەکان

چاوپێکەوتن

ڕزگار ڕه‌ئوف: یه‌که‌م کوردم ده‌بمه‌ ڕاهێنه‌ری دوو هه‌ڵبژارده‌ی عیراق و ژیما ده‌گه‌یه‌نینه‌ ئاسیا

خه‌ڵک سپۆرت – تایبه‌ت

ڕزگار ڕه‌ئوف، مامۆستای پێشوی زانکۆی و ڕاهێنه‌ری نێوده‌وڵه‌تی بواری باسکه‌ چاوپێکه‌وتنێکی تایبه‌ت له‌گه‌ڵ “تۆڕی میدیایی خه‌ڵک – خه‌ڵک سپۆرت” ئه‌نجام ده‌دات، له‌وه‌ڵامه‌کانیدا ئاما‌ژه‌ به‌ چه‌ندین بابه‌تی په‌یوه‌ندیدار به‌ ڕێکخراوی ژیما و تایبه‌ت به‌ژیانی خۆی ده‌کات، له‌نمونه‌ی ئه‌و به‌ڵێنانه‌ی یه‌کێتی تۆپی پێی عیراق به‌ کچانی باسکه‌ی ژیما و سلێمانی-یان داوه‌.

له‌م چاوپێکه‌وتنه‌دا گوزه‌رێک به‌نێو کاره‌کانی ئه‌م ڕاهێنه‌ره‌ خۆبه‌خشه‌دا ده‌که‌ین، که‌ ئه‌زمونی خۆی له‌ کوردستان و ئه‌مریکا کۆکردۆته‌وه‌ له‌ ڕێکخراوێکی تایبه‌ت به‌ خانمان به‌کاریخستووه‌، ئه‌م کاره‌ش بۆته‌ جێی تێڕامانی که‌سانی بیانی و له‌ناوخۆی کوردستانیش جێده‌ستیان به‌ڕونی دیاره‌، به‌شێوه‌یه‌ک که‌ چاوه‌ڕوان ده‌کرێت داهاتوی باسکه‌ی کچانی عیراق بکه‌وێته‌ نێو مشتی ڕاهێنه‌ری ناوبراو و هاوکارانیه‌وه‌.

سڵاو مامۆستا، ده‌توانیت پێمان بڵێیت ڕزگار ڕه‌ئوف کێیه‌؟

ڕزگار موحه‌مه‌د ڕه‌ئوف کوڕی مه‌لا ڕه‌ئوفی ده‌روێش تۆفیقی هه‌ڵه‌بجه‌ییم، له‌ساڵه‌کانی شه‌سته‌وه‌ دانیشتوی شاری سلێمانین، باوکم شه‌هیدی یه‌کێتیه‌ و باپیرم عومه‌ری حاجی سه‌عید شه‌هیدی حامیه‌یه‌، شه‌هیدی زینده‌به‌چاڵی حامیه‌یه‌، له‌ خانه‌واده‌یه‌کی هه‌ژاره‌وه‌ په‌روه‌رده‌ بووم، له‌ زانکۆی سه‌ڵاحه‌دین کۆلێجی په‌روه‌رده‌ی وه‌رزشیم ته‌واو کردووه‌، ماسته‌رم هێناوه‌ له‌زانکۆی سلێمانی، ئێستاش خوێندکاری دکتۆرام له‌کۆتایی تێزی دکتۆراکه‌مدام و خۆم بۆ گفتوگۆی کۆتایی‌ ئاماده‌ ده‌که‌م، خاوه‌نی خێزانێکی خنجیلانه‌م و دوو منداڵم هه‌یه‌ به‌ناوی هه‌رمێ و هه‌ستی و خاوه‌نی ڕێکخراوی ژیمام.

له‌بواری باسکه‌دا وه‌ک یاریزان و ڕاهێنه‌ر که‌سێکی ناسراویت، ده‌توانیت به‌ خوێنه‌رانی (خه‌ڵک سپۆرت) بڵێیت چیت کردووه‌‌؟

له‌بواری وه‌رزشدا ڕه‌نگه‌ زیاده‌ڕه‌وی نه‌بێت ئه‌گه‌ر بڵێم هه‌موو شتێکم کردووه‌ و هیچ نه‌ماوه‌ بیکه‌م، ته‌نها ئه‌وه‌ی ماوه‌ به‌ده‌ستهێنانی نازناوێکه‌ له‌سه‌ر ئاستی نێوده‌وڵه‌تی‌، کتێنێکم به‌زمانی ئینگلیزی له‌ ئه‌مریکا نزیکی بڵاوکردنه‌وه‌یه‌، پێشتر فیلمێکی دوکۆمێنتاری له‌سه‌ر یه‌کێک له‌ فێرخوازه‌کانم له‌ ئه‌مریکا بڵاوکرایه‌وه و له‌لایه‌ن تۆڕی “ئی ئێس پی ئێن”وه‌ جارێک چاوپێکه‌وتنم له‌گه‌ڵدا ئه‌نجامدراوه‌‌ به‌وپێیه‌ی تێزی دکتۆراکه‌م له‌ ئه‌مریکا بوو، له‌هه‌شت وانه‌ی جیاوازدا له‌زانکۆی تینێسی که‌ یه‌کیکه‌ له‌ باشترین زانکۆکانی ئه‌مریکا وانه‌م وتۆته‌وه‌.

ئێستا له‌بواری ڕاهێناندا کارت چییه‌؟

ڕاهێنه‌ری نێوده‌وڵه‌تیم، ڕاهێنه‌ری هه‌ڵبژارده‌ی عیراقی ٣ * ٣ و ڕاهێنه‌ری هه‌ڵبژارده‌ی عیراقی یه‌که‌می کچانم، خاوه‌نی ڕێکخراوی ژیمام که‌ وه‌ک چرا له‌شاری سلێمانی ڕۆشنایی داوه‌ به‌بواری وه‌رزش، پاسێکمان هه‌یه‌ و فه‌ندێکی مانگانه‌ی ئاساییمان وه‌رگرتووه‌.

بڕوانامه‌ی چیت هه‌یه‌؟ له‌کوێ هێناوته‌ و چ پسپۆریه‌کت هه‌یه‌؟

وه‌ک وتم بڕوانامه‌که‌م بریتیه‌ له‌ دکتۆرا و به‌شێکی تاقیکارییه‌کانم له‌ سلێمانی و به‌شێکی له‌ ئه‌مریکا بووه‌، زانکۆی تینیسی ئه‌مریکی متمانه‌یان پێکردم تا له‌و وڵاته‌ هه‌شت وانه‌ی جیاواز بڵێمه‌وه‌ له‌پۆله‌کانی ئه‌و زانکۆیه‌، به‌تایبه‌ت یه‌کێک له‌ پۆله‌کانم که‌ ته‌واوی خوێندکاری دکتۆرا و ماسته‌ر بوون.

بیرۆکه‌ی ژیما هی کێیه‌؟ چۆن دامه‌زرێنرا؟

بیرۆکه‌ی ژیما بیرۆکه‌ی به‌نده‌ بوو، پاش ئه‌وه‌ی له‌ یه‌کێک له‌ یانه‌کانی سلێمانی موچه‌یه‌کی زۆرمان زه‌وت کرا و ناهه‌قییه‌کی زۆرمان به‌رامبه‌ر کرا، خۆم و ٤٥ کچه‌ یاریزان به‌ پاڵ کراینه‌ ده‌ره‌وه‌، خه‌ڵکی شاری سلێمانی ئاگاداری ئه‌و بابه‌ته‌ن‌، دوای ئه‌وه‌ی ڕوویدا بیرۆکه‌ی ژیما هاته‌ ئاراوه‌.

بۆچی ناوی ژیما-تان هه‌ڵبژارد، ژیما واتای چییه‌؟

ژیما واتا ڕێگه‌ی ژیان، ناوێکی زۆر جوانی مێینه‌یه‌ و له‌ڕێکخراوێکدا بۆ کچانی کوردستان خۆی ده‌بینێته‌وه‌، ئه‌م ڕێکخراوه‌ په‌ره‌ ده‌دات به‌ کچانی شاره‌که‌م و کوردستان به‌گشتی بۆ ئه‌وه‌ی ببنه‌ کادر و کاریزما بۆ داهاتو، کار بۆ ئه‌وه‌ ده‌که‌ین جێگه‌ی کچان بکه‌ینه‌وه‌ له‌بواری باسکه‌دا‌، به‌شێوه‌یه‌کی ئه‌کادیمی له‌پاڵ یاریی کردندا کۆمه‌ڵێک کارامه‌یی ژیانیان فێرده‌که‌ین تا له‌داهاتودا جگه‌ له‌ یاریزان ببن به‌ دایکێکی سه‌رکه‌وتو، له‌ساڵی ٢٠١٦ پاش ئه‌وه‌ی له‌ ئه‌مریکا گه‌ڕامه‌وه‌ توشی نا ئومێدیه‌کی زۆریان کردم و دژایه‌تی توندیان کردم، دواتر هاتین و به‌ هاوکاری حکومه‌ت ئه‌م هه‌نگاوه‌مان نا.

له‌ ئه‌مریکا ژیاویت، چ کاریگه‌ریه‌کی له‌سه‌ر ژیانت هه‌بووه‌ وه‌ک ڕاهێنه‌ر و خوێندکار و ڕاهێنه‌ر؟

له‌ته‌مه‌ندا سێ جار گه‌شتم بۆ ئه‌مریکا کردووه‌ له‌ساڵانی ٢٠٠٩، ٢٠١١، ٢٠١٦، گه‌شته‌کانم نه‌ک به‌ته‌نها کاریگه‌ری له‌سه‌ر ژیانم هه‌بوو، به‌ڵکو هه‌موو ژیانی گۆڕیم، منی له‌که‌سێکی خۆپه‌رسته‌وه‌ کرده‌ خۆبه‌خش، منی له‌ که‌سێکی تاڕاده‌یه‌ک خۆبه‌زلزانه‌وه‌ کرده‌ که‌سێکی ساده‌ و ساکار، گه‌یاندمیه‌ ئاستێک که‌ تێگه‌یشتم ژیان ئه‌وه‌نییه‌ ئێمه‌ لێی تێگه‌یشتوین، بگره‌ زۆر جیاوازتره‌ له‌وه‌ی ڕۆژانه‌ تیایدا ده‌ژین، بۆیه‌ ده‌توانم ئه‌مریکا ناوبنێم باوکی دووه‌مم.

چه‌ند فێرخوازتان هه‌یه‌؟ ده‌توانیت ناوی ڕاهێنه‌ره‌ هاوکاره‌کانت بڵێیت و بڕوانامه‌یان چییه‌؟

ئێمه‌ نزیکه‌ی ١٥٠ کچه‌ یاریزانمان هه‌یه‌، کچی تێدایه‌ چوار ساڵه‌ و تیایاندایه‌ ٢٥ بۆ ٢٦ ساڵه‌، ئه‌م کچانه‌ به‌درێژایی ڕۆژه‌کانی هه‌فته‌ له‌ ژیما مه‌شق و ڕاهێنان ده‌که‌ن، هاوکاره‌کانم کۆمه‌ڵێک خوێندکاری خۆم و هاوڕێی دێرین و دۆستی نزیکن، له‌نمونه‌ی مامۆستا چنار فه‌تاح که‌ خوێندکاری خۆم بووه‌ له‌ کۆلێجی په‌روه‌رده‌ی وه‌رزش، مامۆستا سۆران عوسمان که‌ مامۆستا بوو له‌ قوتابخانه‌ی ئاینده‌ و مامۆستای وه‌رزشییه‌، هه‌روه‌ها کاک سانا له‌گه‌ڵماندا کارده‌کات که‌سێکی خۆبه‌خش و دڵسۆزه‌ بۆ ژیما، مامۆستا کارزان له‌گه‌ڵماندایه‌ و‌ بڕوانامه‌ی نێوده‌وڵه‌تی هه‌یه‌ له‌ بواری داوه‌ری تۆمار و کاتدا و ناوبژیوانی پله‌ یه‌کی یاریی باسکه‌یه‌، جگه‌ له‌وانه‌ی ناوم هێنان مامۆستا هێرش و مامۆستا هه‌رێم له‌گه‌ڵماندان له‌گه‌ڵ کۆمه‌ڵێک خانمی تر که‌ سه‌رجه‌میان خۆبه‌خش له‌گه‌ڵماندا کارده‌که‌ن، به‌ڵام ئێستا ناوه‌کانیان له‌ هزرمدا نییه‌.

فێرگه‌یه‌ک به‌و گه‌وره‌ییه‌ پێویستی به‌ پێداویستییه‌، ئایا یاریگای تایبه‌ت به‌خۆتان هه‌یه‌؟

نه‌خێر، به‌داخه‌وه‌ یاریگای تایبه‌ت به‌خۆمان نییه،‌ له‌به‌رئه‌وه‌ی پێشتر له‌ سلێمانی گرنگی ئه‌وتۆ به‌ باسکه‌ی کچان نه‌دراوه‌، له‌ئێستادا توانیومانه‌ ئه‌و مۆدێله‌ بگۆڕین و وا بکه‌ین خه‌ڵکانێکی زیاتر گرنگی به‌ باسکه‌ی کچان بده‌ن.

که‌واته‌ له‌کوێ مه‌شق و ڕاهێنان ده‌که‌ن؟

به‌ سوپاسه‌وه‌، یانه‌ی ڕۆژ و کاک شێخ نوری و کاک شێخ محمد و هه‌موو کارگێڕی یانه‌ی ڕۆژ هاوکارمان بوون، نه‌ک به‌ته‌نها ده‌رگای یانه‌که‌یان بۆ کردوینه‌ته‌وه‌، به‌ڵکو هۆڵه‌که‌شیان خستۆته‌ خزمه‌تمانه‌وه‌ بۆئه‌وه‌ی مه‌شقی تێدا بکه‌ین، به‌یه‌که‌وه‌ به‌شێوه‌یه‌کی ناوازه‌ خۆمان گونجاندووه‌، ئێمه‌ له‌به‌رامبه‌ر چاکه‌ی ئه‌واندا هه‌رچی که‌موکوڕی یاریگاکه‌ بێت چاره‌سه‌ری ده‌که‌ین و به‌رده‌وام خاوێنی ده‌که‌ینه‌وه‌، توانیومانه‌ به‌یه‌که‌وه‌ ڕوویه‌کی کۆمه‌ڵایه‌تی به‌ یاریگاکه‌ بده‌ین  و وه‌ک خوشک و برا هه‌مووان تیایدا کار ده‌که‌ین، خه‌ڵکانی ته‌ندروست و که‌م ئه‌نداممان به‌یه‌که‌وه‌ له‌یه‌ک یاریگادا کۆکردۆته‌وه‌.

که‌سی حیزبی و حکومی پاڵپشتی کردون؟

نه‌خێر، له‌سه‌ره‌تای دامه‌زراندنی ژیما کاک فاروقی مه‌لا مسته‌فا بڕێک پاره‌ی پێداین، هه‌روه‌ها دوو هاوڕێی خۆم یاریده‌یان داین، له‌دوای ئه‌وه‌ش دکتۆر هه‌ڤاڵ ئه‌بوبه‌کر پارێزگاری سلێمانی بڕی ده‌ هه‌زار دۆلاری پێبه‌خشین و توانیمان له‌گه‌ڵ هاوکاریه‌کانی که‌سانی تردا پاسێکی بۆ یاریزانان بکڕین، ئه‌وه‌ی له‌ڕاستیدا یاریده‌ی داوین که‌سانی حیزبی و حکومی نه‌بوون و ته‌نها که‌سانی هاوڕێ و دۆستی که‌سیی خۆمان بون، بۆنمونه‌ دکتۆر هه‌ڤاڵ ئه‌بوبه‌کر له‌خۆشه‌ویستی خۆی بۆ من وه‌ک هاوڕێ که‌ له‌سه‌ر ئاستی خێزان ناسیاویمان هه‌یه‌ ئه‌م کاره‌ی بۆکردوین.

دکتۆر هه‌ڤاڵ چۆن بیر له‌ ژیما ده‌کاته‌وه‌؟

ئه‌و پێی وایه‌ ژیما پێداویستیه‌کی گه‌وره‌ی کۆمه‌ڵگای ئێستای کو‌رده‌وارییه،‌ به‌وپێیه‌ی ئێمه‌ هه‌موو هه‌وڵێکمان ئه‌وه‌یه‌ له‌پاڵ وه‌رزشدا کچه‌کانمان بکه‌ینه‌ دایکێکی باش،‌ ئه‌وه‌ش هه‌ندێجار له‌ چاره‌سه‌رکردنی نه‌خۆش باشتره‌، دکتۆر هه‌ڤاڵ پێی گرنگه‌ یاریده‌ی ڕێکخراوێکی وه‌ک ژیمان بکرێت که‌ پێویستیان به‌ هاوکاری زیاتره‌ له‌یانه‌کان، یانه‌کان پێشتر فه‌ندی باشتریان به‌ده‌ستهێناوه‌ و کاری ئه‌وتۆشیان پێنه‌کردووه‌، جگه‌ له‌وه‌ خه‌ڵکانێکی تریش هاوکاریان کردوین وه‌ک دایکان و باوکان که‌ زۆر په‌رۆشن بۆ ئه‌م پرۆگرامه‌،‌ ده‌بینن دوای په‌یوه‌ندیکردنی کچه‌کانیان به‌ ژیماوه‌ گۆڕانکاری له‌ڕووی سایکۆلۆجی و جه‌سته‌یی و کۆمه‌ڵایه‌تیان به‌سه‌ردا دێت، ئه‌م کچانه‌ زۆر ڕێکخراو ده‌بن و که‌سایه‌تیان به‌هێز ده‌بێت، جیاوازییه‌که‌ به‌ڕونی دیاره‌ پێیانه‌وه‌، تائێستا پێویستمان به‌وان نه‌بووه‌، به‌ڵام له‌داهاتودا بۆ ئه‌وه‌ی ببینه‌ خاوه‌نی یاریگایه‌که‌ی تایبه‌ت ڕه‌نگه‌ کارمان پێیان بێت و سودیان لێوه‌ربگرین.

پلانی داهاتوتان چییه‌؟

پلانی داهاتومان ئه‌وه‌یه‌ له‌گه‌ڵ هه‌ڵبژارده‌ی عیراق بچینه‌ پاڵه‌وانێتیه‌کانی ئاسیاوه‌، به‌پشتیوانی خودا ئه‌گه‌ر بکرێت ساڵی ٢٠١٩ ساڵی ترۆپکی تواناکانی ژیما ده‌بێت، چونکه‌ یه‌کێتی تۆپی باسکه‌ی عیراق ده‌یه‌وێت ژیما بنێرێته‌ پاڵه‌وانێتی ئاسیا بۆ ته‌مه‌نی خوار ١٦ ساڵ، مه‌به‌ست له‌م هه‌نگاوه‌ش پێکهێنانی پێکهاته‌یه‌کی نمونه‌یی ئه‌زمونداری بۆ عیراق به‌گشتی.

مه‌به‌ست له‌ دامه‌زراندنی ژیما چییه‌؟ ئایا پڕۆسه‌یه‌کی هاوشێوه‌ی به‌ره‌وپێشجونی باسکه‌ی لوبنانه‌؟

مه‌به‌ست له‌ دامه‌زرادنی ژیما جگه‌ له‌وه‌رزش و پێگه‌یاندنی لاوان، چاککردنی کۆمه‌ڵه‌گه‌یه‌ له‌ڕووه‌ کۆمه‌ڵایه‌تیه‌کانه‌و به‌تایبه‌ت ئه‌و ڕووه‌ی کارمان پێده‌کرێت له‌سه‌ری، ده‌مانه‌وێت فێرخوازان له‌ڕووی سایکۆلۆجی و کۆمه‌ڵایه‌تیه‌وه‌ به‌ره‌وپێش ببه‌ین.

دایکان و باوکان کاردانه‌وه‌یان پرسیار له‌مێشکیاندا دروست نه‌بووه‌، کاتێک ده‌بینن منداڵه‌کانیان به‌وشێوه‌یه‌ گۆڕانکاریان به‌سه‌ردا دێت؟

به‌نیازین له‌ داهاتودا تیپی دایکان دروست بکه‌ین، دایکی فێرخوازه‌کانمان له‌پێکهاته‌یه‌کدا کۆده‌که‌ینه‌وه‌ بۆ ئه‌وه‌ی نیشانی بده‌ین که‌ ئه‌وانیش له‌ته‌مه‌نێکی گه‌وره‌دا ده‌توانن یاریی “باسکێت بۆڵ” بکه‌ن، ئه‌وه‌ش ئامانجێکی له‌پشته‌، ده‌مانه‌وێت ئه‌و پڕۆسه‌یه‌ی فێرخوازه‌کانی پێدا ده‌ڕۆن دایکان و باوکانیشی به‌هه‌مان شێوه‌ تێستی بکه‌ن و خۆیان بزانن چ سودێکیان پێده‌گه‌یه‌نرێت، ده‌توانم بڵێم دامه‌زرادنی ژیما مۆدێلێکی خۆبه‌شی نوێ بوو سوپاس بۆ خودا سه‌رکه‌وتو بوین له‌و کاره‌دا.

دژایه‌تی ده‌کرێن؟

به‌ڵێ، به‌داخه‌وه‌ له‌لایه‌ن که‌سانی ناحه‌زه‌وه‌ دژایه‌تی ده‌کرێین، ڕه‌نگه‌ هۆکاره‌که‌ی ئیره‌یی هه‌ر بابه‌تێکی دیکه‌ بێت.

ناخۆشترین ساته‌کانی ژیانت له‌بواری وه‌رزشدا چی بووه‌؟

ناخۆشترین ساتی ژیانم به‌داخه‌وه‌ ئه‌و ساتانه‌ بوو له‌گه‌ڵ یانه‌ی سیروانی نوێ به‌سه‌رم برد.

خۆشترین ساتی ژیانت له‌بواری وه‌رزشدا چییه‌؟

خۆشترین ساته‌کانی ژیانم ئه‌م دوو ساڵه‌ بووه‌ که‌ له‌گه‌ڵ ژیما به‌سه‌رم بردووه‌، پێوایه‌ خودای گه‌وره‌ تاڵی نیشاندام تا دواتر به‌شیرینی ژیما قه‌ره‌بووم بکاته‌وه‌، لێره‌وه‌ من سوپاسی هه‌موو ئه‌و که‌س و یانانه‌ ده‌که‌م که‌ دژایه‌تیان کردم، ئه‌گه‌ر ئه‌وان دژایه‌تیان نه‌کردمایه‌ من نه‌ده‌بومه‌ خاوه‌نی ژیما.

ده‌ڵێن پێداگری له‌ ئه‌رکێکی وه‌رزشی بکه‌یت ده‌بێت بیگه‌یه‌نیته‌ ئه‌نجام؟ ئه‌وه‌ ڕاسته‌‌؟

به‌ڵێ، به‌ پشتیوانی خودا شتێکم بوێت یاخود ئامانجێک دیاریم کردبێت هه‌ر ده‌یگه‌نمه‌ ئه‌نجام، دامه‌زراندنی ژیما خۆی له‌خۆیدا وه‌ڵامێک بوو بۆ هه‌موو ئه‌وانه‌ی دژایه‌تیان ده‌کردم، چونکه‌ نه‌ک به‌ته‌نها له‌کاتێکی ناخۆشدا دامانمه‌زراند، به‌ڵکو خه‌ڵک برسی بوو به‌هۆی قه‌یرانه‌وه‌ ئێمه‌ توانیمان ئامانجی خۆمان بپێکین، ئێستا تاڕاده‌یه‌ک ژیان بوژاوه‌ته‌وه‌ ژیماش له‌گه‌ڵ بارودۆخه‌که‌ و خه‌ڵکیدا زیاتر و زیاتر گه‌شه‌ی کردووه‌.

جگه‌ له‌ وه‌رزشی باسکه‌، چی فێری یاریزانه‌کانت ده‌که‌یت؟

جگه‌ له‌یاریی کردنی باسکه زۆر شت فێری کچه‌کانمان ده‌که‌ین، پاکوخاوێنی و ژینکه‌ یه‌کێکه‌ له‌ خاله‌ گرنگه‌کان به‌لامانه‌وه‌، زۆرجار به‌یه‌که‌وه‌ ده‌چینه‌ ده‌ره‌وه‌ بۆ ناوچه‌یه‌ک و له‌خۆڵ و خاشاک خاوێنی ده‌که‌ینه‌وه‌، جاری وا هه‌یه‌ به‌کۆمه‌ڵ دار و نه‌مام ده‌نێژین، زۆرجار بیرۆکه‌یه‌کی وه‌رزشی تێکه‌ڵ به‌ژینگه‌ ده‌که‌ین دێین تۆپێک ده‌بڕین و گوڵی تێدا ده‌ڕوێنین، بۆردێک یاخود حه‌له‌قه‌یه‌ک بشکێت ده‌چین تۆپێکی تێدا ده‌چه‌سپێنین و گوڵێکی تێدا ده‌ڕوێنین، وه‌ک پێشتر وتم چه‌ندین کارامه‌یی ژیانیان فێرده‌که‌ین تا بتوانن سه‌ره‌تا له‌ خێزانه‌که‌ی خۆیانه‌وه‌ گۆڕانکاری بکه‌ن پاشان به‌ره‌و کۆمه‌ڵگا به‌گشتی.

یه‌کێک له‌ گۆڕانکارییه‌کان له‌بواری وه‌رزش و ژیاندا که‌ ئێوه‌ ده‌یکه‌ن چییه‌؟

به‌شێوه‌ی ئه‌کادیمی و ته‌ندروست پلان بۆ ژه‌مه‌ خۆراکی یاریزانان و کات و واده‌ی خه‌وتنیان بۆ دیاری ده‌که‌ین، توانیومانه‌ پرۆگرامیان له‌به‌کارهێنانی ته‌کنه‌لۆجیا و مۆبایل و ئایپاد بگۆڕین تا له‌ماڵه‌وه‌ وا هه‌ست بکه‌ن له‌گه‌ڵ دایک و باوکیان ژیان ده‌گوزه‌رێنن، ئه‌وه‌ش سودی کۆمه‌ڵایه‌تی و بێگومان وه‌رزشیشی هه‌یه‌.

ده‌زگاکانی ڕاگه‌یاندن به‌پێی پێویست هاوکارتان بوون؟

جگه‌ له‌ که‌ناڵی (که‌ی ئێن ئێن) ده‌زگاکانی ڕاگه‌یاندن به‌گشتی هاوکاری به‌هێزی ئێمه‌ نه‌بوون، به‌شێوه‌یه‌کی گشتگیر ده‌زگاکان به‌شێوه‌ی پچڕ به‌هه‌موو ده‌نگ و ڕه‌نگیانه‌وه‌ خۆبه‌خش کاریان له‌سه‌ر کردوین، چونکه‌ که‌سانی ڕاگه‌یاندنکار زیره‌کن پێشتر درکیان به‌وه‌کردووه‌ ژیما له‌داهاتودا ده‌بێته‌ چرایه‌ک به‌سه‌ر کوردستان و به‌تایبه‌ت شاری سلێمانیه‌وه‌.

بون به‌ ڕاهێنه‌ری هه‌ڵبژارده‌ی عیراق چ هه‌ستێکی پێدایت؟

هه‌ستێکی ناوازه‌ی پێدام، وه‌ڵام بوو بۆ هه‌موو ئه‌و ناحه‌زانه‌ی پێیان وابوو که‌س ناتوانێت بگاته‌ پله‌یه‌کی باڵا، له‌ڕووی سایکۆلۆجییه‌وه‌ زۆر کاریگه‌ری هه‌بوو، وه‌ک یه‌که‌م کورد له‌مێژووی باسکه‌ی عیراقدا توانیم ببمه‌ ڕاهێنه‌ری دوو هه‌ڵبژارده‌ی عیراق، نه‌ک یه‌ک هه‌ڵبژارده‌، به‌ڵکو دووان.

ده‌توانیت سود له‌ ژیما وه‌ربگیریت بۆ هه‌ڵبژارده‌ی عیراق؟

به‌ڵێ ده‌توانین سود له‌ژیما وه‌ربگرین بۆ هه‌ڵبژارده‌ی عیراق، له‌به‌رئه‌وه‌ی ئێمه‌ پلانێکی درێژخایه‌نی چوار بۆ شه‌ش ساڵه‌مان داڕشتووه‌ تا ساڵی ٢٠٢٢ ده‌بینه‌ خاوه‌نی هه‌ڵبژارده‌یه‌کی به‌توانا، پلانه‌که‌ به‌شێوه‌یه‌که‌ که‌ له‌ ئه‌قڵیه‌تی شکسته‌وه‌ پێکهاته‌یه‌ک به‌ فه‌لسه‌فه‌ی بردنه‌وه‌ و پاڵه‌وانبونه‌وه‌ بونیاد بنێین بتوانێت کێبڕکێی هه‌ڵبژارده‌ گه‌وره‌ و ناوداره‌کان بکات.

له‌ده‌ره‌وه‌ی کوردستان شاره‌زایان ده‌رباره‌ی ژیما چیت پێده‌ڵێن ؟ ئه‌مریکیه‌کان ده‌رباره‌ی ئه‌م ڕێکخراوه‌ بۆچونیان چۆنه‌؟ له‌ڕووی ماددی و مه‌عنه‌وی هاوکاریان کردویت ؟

زۆرجار که‌سانی بیانی له‌تۆڕه‌ کۆمه‌ڵایه‌تیه‌کانه‌وه‌ ده‌ستخۆشیمان لێده‌که‌ن، ئه‌مریکیه‌کانیش ئه‌وانه‌ی هاوڕێمن و له‌ ئه‌مریکا له‌م بواره‌دا کارده‌که‌ن سه‌رسام بوون، پێیان وایه‌ شتێکی گه‌وره‌ و سه‌رسامکه‌ره‌ به‌و ئاست و تێگه‌یشتنه‌وه‌ له‌وڵاتێکی خۆرهه‌ڵاتیدا کچان و ژنان بتوانن یاریی باسکه‌ بکه‌ن، چه‌ندین جار سه‌رسامبونی خۆیان پێڕاگه‌یاندوم و ئاماده‌یشیان نیشانداوه‌ له‌ڕووه‌ وه‌رزشیه‌کانه‌وه‌ یاریده‌مان بده‌ن.

ئایا ئه‌م هه‌موو کاره‌ پێویستی به‌ سپۆنسه‌ر و پاڵپشتی ماددی گه‌وره‌تر نییه‌؟

به‌دڵنیاییه‌وه‌ ژیما پێویستی به‌ سپۆنسه‌رێکی گه‌وره‌ هه‌یه‌، به‌داخه‌وه‌ تائێستا له‌وڵاتی ئێمه‌دا درک به‌وه‌ نه‌کراوه‌ و تێگه‌یشتن نه‌بووه‌ بۆ ئه‌وه‌ی که‌ ژیما  ده‌یکات، ژیما پێویستی به‌ بوژاندنه‌وه‌ و سپۆنسه‌ری گه‌وره‌یه‌‌.

کۆمپانیا گه‌وره‌کان هیچ کاردانه‌وه‌یان نه‌بووه‌؟ به‌ڵێنیان پێنه‌داون؟

نه‌خێر به‌داخه‌وه‌… کۆمپانیا گه‌وره‌کان له‌نمونه‌ی “ئاسیا سێڵ” هه‌ر نه‌بوایه‌ ده‌یانتوانی یاریده‌ده‌ربن له‌ هاوکاریکردنی دارایی ژیما و بیناکردنی یاریگایه‌کی داخراو بۆمان، باشتر ده‌بوو ئه‌گه‌ر هۆکاره‌کانی گواستنه‌وه‌یان بۆ دابین بکردینایه‌، چه‌ندین پێداویستیمان هه‌یه‌ که‌ به‌خۆمان و ئه‌و فه‌نده‌ ناکرێت پێمان دراوه‌، به‌ڵکو ئه‌وه‌ کاری سپۆنسه‌ری گه‌وره‌یه‌، به‌ڵکو حه‌زمان ده‌کرد لۆگۆی کۆمپانیایه‌کی سپۆنسه‌ری گه‌وره‌ له‌سه‌ر درێسه‌کانمان بوایه‌، کێشه‌که‌ له‌وه‌دایه‌ به‌درێژایی مێژووی سلێمانی یانه‌کان سپۆنسه‌ریان وه‌رگرتووه‌ و له‌کۆتاییدا ئه‌نجامه‌که‌ی دیار نه‌بووه‌، بۆیه‌ ئێمه‌ش له‌م نێوه‌نده‌دا خوێندنه‌وه‌مان بۆ کراوه‌.

چ زه‌مانه‌تێک ده‌ده‌یت به‌ فێرخوازه‌کانت؟ داهاتویان به‌ چی ده‌گه‌یه‌نیت؟

(به‌پێکه‌نینه‌وه‌) به‌دڵنیاییه‌وه‌ پێتان ده‌ڵێم تیپه‌کانی ئێمه‌ ده‌بنه‌ نوێنه‌ری هه‌ڵبژارده‌ی عیراق له‌سه‌رجه‌م بۆنه‌ نێوده‌ولته‌یه‌کاندا، که‌ ئه‌مه‌ش به‌بڕوای من گرنگ نییه‌ له‌م قۆناغه‌دا، به‌ڵکو گرنگترین شت ئه‌وه‌یه‌ له‌دوو تا سێ ساڵی داهاتودا بتوانین پێکهاته‌یه‌ک بونیاد بنێین له‌پاڵه‌وانێتیه‌کانی ده‌ره‌وه‌ی عیراق ململانێی گه‌وره‌کان بکات و بردنه‌وه‌ به‌ده‌ست بهێنێت.

مه‌به‌ستت چ ئه‌نجام وپێکهاته‌یه‌که‌؟

به‌واتای ئه‌وه‌ی پێکهاته‌ی داهاتومان هاوشێوه‌ی هه‌ڵبژارده‌کانی تری عیراق نه‌بێت که‌ ده‌چنه‌ ده‌ره‌وه‌ و ده‌ستبه‌تاڵ ده‌گه‌ڕێنه‌وه‌، ده‌مانه‌وێت خاونی پێکهاته‌یه‌کی ململانێکار بین بۆ وڵاته‌ عه‌ره‌بیه‌ به‌هێزه‌کانی وه‌ک لوبنان و میسڕ و سوریا ئه‌گه‌ر بکرێت له‌گه‌ڵ چین و ژاپۆن، ئه‌وه‌ش به‌نسبه‌ت کچانی سلێمانیه‌وه‌ قورس نییه‌ و له‌توانایاندایه‌، ئێمه‌ جورئه‌ت و حه‌ماسه‌تی ئه‌وه‌مان هه‌یه‌ و دڵنیاین پێمان ده‌کرێت، به‌ڵام ده‌بێت ئاماژه‌ به‌وه‌ش بکه‌م که‌ ئه‌م‌ کاره‌ ماندوبون وپلانی ده‌وێت، هیوادارم له‌داهاتودا بتوانین هه‌موو ئه‌وکارانه‌ بکه‌ین.

ریکلام

چاوپێکەوتن

لوکا تۆنی: گابریال جیزوس باشترین یاریزانە بۆ یاریکردن لەگەڵ کریستیانۆ

خەڵک سپۆرت

لوکا تۆنی ئەستێرەی دێرینی ئیتاڵیا چاوپێکەوتنێک لەگەڵ ماڵپەڕی “توتۆ سپۆرت”ی ئیتاڵی ئەنجام دەدات و وەڵامی چەندین پرسیاری گرنگ دەداتەوە.

لە وەڵامەکانیدا باس لە ئەگەرەکانی گواستنەوەی گابریال جیزوسی هێرشبەری یانەی مانچستەر سیتی بۆ یوڤانتۆس دەکات و بۆچوونەکانی خۆی بەم شێوەیە دەردەبڕێت:

 

ڕات بەرامبەر یوڤانتۆس و ئەگەرەکانی ئەنجامدانی گۆڕانکاری لەو یانەیە چییە بۆ وەرزی داهاتوو؟

بابەتێکی ئاساییە لەکاتێکدا یاریزانانی یوڤانتۆس تەمەنیان هەڵکشاوە، بۆنمونە هیگواین هێرشبەرێکی گەورەیە و تەمەنی ٣٣ ساڵە و کریستیانۆ کە دیاردەی تۆپی پێیە گەیشتووە بەتەمەنی ٣٥ ساڵ، کڕینی یاریزانی لاو و کۆکردنەوەی تێکەڵەیەک لە لاوان و ئەزمونداران بیرکردنەوەیەکی جوانە.

 

پێنج هێرشبەر کە پێکهاتوون لە: هالاند، ئیکاردی، گابریال جیزوس، هاری کەین و تیمۆ ڤێرنەر پاڵێوراون بۆ پەیوەندیکردن بە یوڤانتۆس، بەڕای تۆ کامیان باشترە؟

بەڕای من هاری کەین هێرشبەرێکی تێروتەسەلترە لەوانەی تر و هەمیشە لەنێو یاریگادا جیاوازی دروست دەکات، هەموو وەرزێک گۆڵی بێشومار تۆماردەکات و بۆندێکی گەورە و گونجاو دەبێت بۆ یوڤانتۆس.

 

پێتوایە کەین لە ئاستی ئیکاردیدا بێت؟

نەخێر، هاری کەین کەمێک باشترە، ئەگەر خاڵ بە هێرشبەرەکان بدەم ٩ بۆ کەین، هەشت بۆ ئیکاردی، ماورۆ هێرشبەرێکی بەتوانایە لەکۆتاییهێنان بەهێرشەکان، بەڵام ئێستا لەئاستی ئاسایی خۆیدا نییە.

 

ئەی ئەگەر ژمارە بدەیت بە هێرشبەرەکانی تر؟

جیزوس ٨.٥، هالاند ٧.٥ و ڤێرنەر ٧یان پێدەدەم، ڕاستە تیمۆ ڤێرنەری ئەڵمانی هێرشبەرێکی نێودەوڵەتی گەورەیە و یاریدەدەری لایپزیگ بووە لەسەرکەوتنەکاندا، بەڵام هێشتا ماویەتی ئەزمون پەیدابکات، هالاندیش یاریزانێکی لاوە و سەرەڕای ئەوەی توانیویەتی تواناکانی بسەلمێنێت لەماوەیەکی کورتدا، بابزانین لە داهاتوودا چی زیاتری پێدەکرێت.

 

بەڵام باسی گابریال جیزوست نەکرد؟

جیوزس هێرشبەرێکی خێرایە، لەڕووی هونەرییەوە بەتوانایە، لەگەڵ تۆماری گۆڵدا گۆڵیش دروست دەکات.

 

بەڕای تۆ کام لەو هێرشبەرانە باشترە بۆ یاریکردن لەگەڵ کریستیانۆ ؟

بێگومان گابریال جیزوس، ڕاستە لەوانەی تر گۆڵ کەمتر تۆماردەکات، بەڵام باشترین یاریزانە بۆ یاریکردن لەگەڵ کریستیانۆ.

 

بۆچی جیوزس باشترە لەوانی تر؟

هیچ هۆکارێکی تایبەتی نییە، بەڵکو مەسەلەکە ئەوەیە کە کریستیانۆ گۆڵکارە و هەموو وەرزێک گۆڵی بێشومار تۆماردەکات، بۆ ئەم کارەش پێویستی بە هێرشبەرێکی خێرایە مەودای بۆ دروست بکات، ئەوەش بە جیزوس دەکرێت، جگە لەوەش تەمەنی کەمە و زۆری دەبێت پێشکەشی یوڤانتۆسی بکات.

 

ئەندریا پێرلۆی هاوڕێت دەچێتە بواری ڕاهێنانەوە، پێتوایە سەرکەوتوو دەبێت؟

هەمیشە پێمانوابووە لە داهاتوودا پێرلۆ دەبێتە ڕاهێنەرێکی باش، هەمیشە خەونی ئەوەبوو چانسی خۆی لەبواری ڕاهێنان تاقیبکاتەوە، منیش پێموایە ئەو توانا و زیرەکی و لەسەرخۆییەی تێدایە کە بۆ ڕاهێنەرێک پێویستە، دەتوانێت ببێتە ڕاهێنەری یانەیەکی گەورە، بەڵام من پێمباشە لە تیمی لاوانی خوار تەمەن ٢٣ ساڵانی یوڤانتۆسەوە دەستپێبکات.

بەردەوام بە لە خوێندنەوە

چاوپێکەوتن

بارزانی: جوگرافیا سته‌مێكی گه‌وره‌ی له‌ ئێمه‌ كردووه‌

خەڵك – بەشی هەواڵ

 مه‌سعود بارزانی، سەرۆكی پێشووی هەرێم و سەرۆكی پارتی دیموكراتی كوردستان، له‌ديدارێكی تایبەت دا، لەگەڵ كه‌ناڵی “MBC”، رایگەیاند، جوگرافیا سته‌مێكی گه‌وره‌ی له‌ ئێمه‌ كردووه‌‌،ئه‌و كه‌سه‌ی سته‌مكاری به‌رامبه‌ر كراوه‌ و خۆشی سته‌مكاری به‌رامبه‌ر خه‌ڵك بكات، شایانی ئه‌وه‌یە سته‌مكاری زیاتری به‌رامبه‌ر بكرێت.

“MBC”: بەڕێز كاك مەسعود، پێتخۆشە بە مام یان كاك بانگ بكرێیت؟

بارزانی دەڵێت، حەزدەكەم بە كاك مەسعوود بانگ بكرێم، خەڵك و گەلی كوردستان هەر بەوشێوەیە ناوم دەبەن، بابەتەكە پێوەندی بە گەنجییەتی نییە.

“MBC”: زۆر به‌دەگمه‌ن ده‌بینین كاك مه‌سعود جیا لە جلی كوردی جلی دیكە بپۆشێت، ئه‌مه‌ بۆچی؟

سه‌رۆك بارزانی: جلی كوردی جلی پێشمه‌رگه‌یه‌، من له‌و باوه‌ڕه‌دام ئه‌گه‌ر ئه‌م جلانه‌ نه‌پۆشم، شێوازێكی دیكه‌ پیشان ده‌دات، له‌وانه‌یه‌ كاریگه‌ری له‌سه‌ر پێشمه‌رگه‌ هه‌بێت.

پرسیارێكی ترى “MBC”  بریتییە لەوەی كە ئایا سەرۆك بارزانی ژیانی شاخ یان كۆشك زیاتر خۆشحاڵی دەكات، لە وەڵامدا سەرۆك بارزانی دەڵێت، ژیانی شاخ، بەلای منەوە ژیانی شاخ خۆشترە.

“MBC”: به‌ڵام ژیانی شاخ سه‌خته‌؟

سه‌رۆك بارزانی: به‌لای منه‌وه‌ پێچه‌وانه‌یه‌، ژیانی شاخ به‌لای منه‌وه‌ خۆشتره‌.

“MBC”: ده‌نگی ته‌قه‌ لای تۆ چی ده‌گه‌ینێت؟

سه‌رۆك بارزانی: بە پێكەنینەوە “میوزیك”.

له‌ وه‌ڵامی ئه‌و پرسیاره‌ی ئایا جوگرافیا سته‌م و زۆرداری له‌ كورد كردووه‌؟  بارزانی جه‌ختی كرده‌وه‌‌: بێگومان جوگرافیا سته‌مێكی گه‌وره‌ی له‌ ئێمه‌ كردووه‌.

“MBC”: ئه‌وه‌ی هه‌میشه‌ سته‌مكاری به‌رامبه‌ر ده‌كرێت، له‌وه‌ ده‌ترسێت كه‌ سته‌مكاری به‌رامبه‌ر خه‌ڵك بكات؟

سه‌رۆك بارزانی: ئه‌و كه‌سه‌ی سته‌مكاری به‌رامبه‌ر كراوه‌ و خۆشی سته‌مكاری به‌رامبه‌ر خه‌ڵك بكات، شایانی ئه‌وه‌یە سته‌مكاری زیاتری به‌رامبه‌ر بكرێت.

“MBC”دوای چوونی بارزانی نه‌مر بۆ یه‌كێتی سۆڤیه‌ت و رووخانی رژێمی پاشایه‌تی له‌ عێراق، ئه‌و شه‌وه‌ی ته‌له‌فۆنێكی له‌ناكاو بۆ سه‌رۆك بارزانی دێت؟

سه‌رۆك بارزانی: من بچووك بووم، من ته‌له‌فۆنه‌كه‌م هه‌ڵگرت، پێی گوتم تۆ كێیت؟ منیش گوتم فڵانه‌ كه‌سم، پێی گوتم بانگی برا گه‌وره‌كه‌ت بكه‌، مه‌به‌ستی خوالێخۆشبوو لوقمان بوو، ئه‌و شه‌هید بوو، چووم بۆ لای پێم گوت كه‌سێك ته‌له‌فۆن ده‌كات و ده‌ڵێت من هه‌واڵێكی زۆر گرنگم پێیه‌، ئه‌ویش هات و ته‌له‌فۆنه‌كه‌ی هه‌ڵگرت، به‌ بڕوای من دوا نیوه‌ڕۆ بوو، كاتێك پێی گوت “باوكت ده‌گه‌ڕێته‌وه‌”، خۆتان ئاماده‌ كه‌ن و وه‌رن بۆ فڕۆكه‌خانه‌، ئێمه‌ش خۆمان ئاماده‌كرد و چووین بۆ فڕۆكه‌خانه‌. له‌ فڕۆكه‌خانه‌ی موسه‌ننا پێشوازیمان لێكرد، رۆژێكی نه‌مر و گه‌وره‌ بوو، هه‌موو گه‌لی عێراق هاتنه‌ سه‌ر شه‌قام، بۆ ئه‌وه‌ی پێشوازی لێ بكه‌ن، به‌لای ئێمه‌وه‌ رۆژێكی مه‌زن بوو.

“MBC”دوای ئه‌وه‌ی بارزانی نه‌مر چه‌كه‌كه‌ی هه‌ڵده‌گرێت و له‌ دژی سته‌مكاریی عه‌بدولكه‌ریم قاسم، ده‌گه‌ڕێته‌وه‌ بۆ شاخ؟

سه‌رۆك بارزانی: عه‌بدولكه‌ریم قاسم رێگه‌ی به‌ باوكم دا بگه‌ڕێته‌وه‌ عێراق، ئه‌و كات كه‌ مامی من “شێخ ئه‌حمه‌د” له‌ زیندان بوو و به‌ له‌سێداره‌دان حوكم درابوو، له‌ زیندان ئازاد كرا، رێگه‌یان به‌ خانه‌واده‌كانماندا بگه‌ڕێنه‌وه‌ ناوچه‌كه‌ی خۆمان له‌ بارزان، گرنگترین شت ئه‌وه‌ بوو كه‌ له‌ ده‌ستووری كاتیدا ئه‌وه‌ بوو كورد و عه‌ره‌ب هاوبه‌شن له‌و نیشتمانه‌دا، ئه‌مه‌ش بۆ ئه‌و كات شتێكی زۆر گه‌وره‌ بوو. گه‌وره‌ترین هه‌ڵه‌ كه‌ عه‌بدولكه‌ریم قاسم كردی ئه‌وه‌ بوو، كه‌وته‌ ژێر كاریگه‌ری ده‌وروبه‌ره‌كه‌ی، له‌ كاتێكدا ده‌وروبه‌ره‌كه‌ی هه‌مووی ژه‌هراوی بوو، خه‌ڵكێك له‌ ده‌وری بوو، له‌ لووتكه‌ی شۆفێنیه‌تدا بوون.

“MBC”: ئه‌وانه‌ی ده‌وروبه‌ری له‌ نه‌ته‌وه‌ی عه‌ره‌ب بوون؟

سه‌رۆك بارزانی: نه‌ته‌وه‌ی عه‌ره‌ب و غه‌یره‌ عه‌ره‌بیش بوون، ئه‌ویان هانده‌دا بۆ ئه‌وه‌ی په‌یوه‌ندی له‌گه‌ڵ هه‌موو ئه‌و كه‌سانه‌ ببڕێت كه‌ پشتگیریان ده‌كرد و به‌رگرییان لێ ده‌كرد، له‌وانه‌ش كورد، به‌ تایبه‌تیش بارزانییه‌كان، به‌ره‌و خاڵێك پاڵیان پێوه‌نا گه‌ڕانه‌وه‌ هه‌نگاوێكی زۆر ئه‌سته‌م بوو، به‌رده‌وام هانیان ده‌دا، وایان لێكرد گومان له‌ باوكم بكات، به‌وه‌ی ده‌بێته‌ سه‌ركرده‌ و شوێنی ئه‌و ده‌گرێته‌وه‌، به‌ڕاستی هه‌ندێك شتی خه‌یاڵییان خسته‌ مێشكییه‌وه‌، بۆیه‌ كه‌وته‌ ژێر كاریگه‌ری ده‌وروبه‌ره‌كه‌ی و له‌ كۆتاییدا ناژیرانه‌ ره‌فتاری كرد، له‌گه‌ڵ ئه‌وه‌شدا من ده‌ڵێم: پێویست بوو له‌گه‌ڵ عه‌بدولكه‌ریم قاسم به‌رده‌وام نه‌بێت، ده‌بوایه‌ به‌ هه‌رشێوه‌یه‌ك له‌ شێوه‌كان لێی دوور بكه‌وێته‌وه‌، به‌ڵام روویدا.

“MBC”: مه‌سعود بارزانی بۆ یه‌كه‌م جار كه‌ له‌ مه‌یدانی جه‌نگ له‌ شۆڕشی ئه‌یلول به‌شداری كرد، له‌ ته‌مه‌نێك بوو كه‌ هێشتا له‌سه‌ر ئه‌وه‌ رانه‌هاتبوو!؟

سه‌رۆك بارزانی: كاتێك شۆڕشی ئه‌یلوول هه‌ڵگیرسا، به‌ ته‌واوی له‌ 11ی ئه‌یلوولی ساڵی 1961 بوو، كاتێك هێزی ئاسمانی عێراقی هێرشی چڕی هێنایه‌ سه‌ر ته‌واوی ناوچه‌كانی كوردستان، له‌ 16ی ئه‌یلوول ئێمه‌ له‌ شوێنێكی باكووری گوندی بارزان بووین له‌ چیای شیرین، من خۆم له‌ ناو چادرێك بووم، كاتێك “فڕۆكه‌ی مێك” ئێمه‌ی بۆردومان كرد، له‌ 20ی گوڵانی ساڵی 1962 په‌یوه‌ندیم به‌ شۆڕشه‌وه‌ كرد، ده‌ستم دایه‌ تفه‌نگ و تا ئێستاش به‌رده‌وامم.

“MBC”: بۆچی تۆ ده‌ڵێیت شۆڕشی ئه‌یلوول گه‌وره‌ترین شۆڕشه‌كانی كوردە، ئایا له‌ هه‌موویان گه‌وره‌تره‌؟

سه‌رۆك بارزانی: چونكه‌ راپه‌ڕین و شۆڕشه‌كانی پێشووتر ناوچه‌یی بوون و له‌ سنوورێكی دیاریكراودا هه‌ڵده‌گیرسان و بۆ ماوه‌یه‌كی دیاریكراویش به‌رده‌وام ده‌بوون، ماوه‌كانیان كورت بوون، سنووری ساڵێك یان چه‌ند مانگێكیان تێپه‌ڕ نه‌ده‌كرد، هه‌رچی شۆڕشی ئه‌یلوول بوو به‌رده‌وام بوو، جه‌نگاوه‌ره‌كانی له‌ هه‌موو پارچه‌كانی كوردستان به‌شدار بوون و په‌یوه‌ندییان به‌ شۆڕشه‌وه‌ كرد، ئافره‌تان خواردنیان پێشكه‌ش به‌ شۆڕش ده‌كرد، زۆر جه‌نگی دژوار روویاندا، ئه‌و شه‌ڕانه‌ له‌ هه‌موو رووداوێك زیاتر له‌ هزرم ماونه‌ته‌وه‌، بۆ نموونه‌‌ شه‌ڕی زاویته‌ له‌ 12ی كانوونی یه‌كه‌می ساڵی 1961، كه‌ شه‌ڕێكی مێژوویی بوو. شه‌ڕی هه‌ندرێن، شه‌ڕی حه‌وزی رواندز، شه‌ڕی چیای مه‌تین، شه‌ڕه‌كانی ساڵی 1963، سه‌ختترین ساڵ بوو له‌ ته‌مه‌نی شۆرشی ئه‌یلول، له‌و ساڵه‌دا نه‌فیرعام هه‌بوو و هه‌ریه‌ك له‌ ئێران و توركیا و سووریاش تێیدا به‌شداربوون.

“MBC”: هه‌موویان به‌شدار بوون؟

سه‌رۆك بارزانی: به‌ڵێ هه‌موویان به‌شداربوون. سوورییه‌كانیش ده‌ستیان به‌ كوده‌تا كرد، دوو لیوای سوپایان نارد، شه‌ڕی ئێمه‌یان كرد و سوپای سووریا رووبه‌ڕووی شكستێكی گه‌وره‌ش بووه‌وه‌. ئه‌و كات له‌ رێگه‌ی ئه‌فسه‌رێكه‌وه‌ هه‌ماهه‌نگی له‌ نێوان هێزه‌كانی توركیا و عێراقدا هه‌بوو و باره‌گاكه‌ی له‌ مووسڵ بوو، هه‌روه‌ها ئه‌فسه‌رێكی ئێرانیش له‌ كه‌ركووك بوو، هه‌ماهه‌نگی ته‌واو له‌ نێوان عێراق، ئێران، توركیا و سووریادا هه‌بوو. ئێمه‌ گه‌مارۆ درابووین، به‌ڵام سوپاس بۆ خودا، سه‌ركه‌وتین.

“MBC”: ئه‌و كات هیچ كاردانه‌وه‌یه‌كی عه‌ره‌بییتان پێ گه‌یشت پشتیوانیتان لێ بكات، یاخود به‌ گشتی عه‌ره‌ب هه‌مووی له‌ دژی ئێوه‌ بوون؟

سه‌رۆك بارزانی: ده‌توانم بڵێم زۆربه‌یان هاوسۆز بوون له‌گه‌ڵمان، به‌ڵام به‌ ئاشكرا هیچ كه‌سێك پشتگیری ئێمه‌ی نه‌كرد، ته‌نیا ئه‌و كاته‌ نه‌بێت كه‌ ناكۆكی كه‌وته‌ نێوان حزبی به‌عس و جه‌مال عه‌بدولناسر، كاتێك محەمەد حەسەن هه‌یكه‌ل له‌ رۆژنامه‌ی ئه‌هرام گوتاری ده‌نووسی و تێیدا پشتیوانی شۆڕشی ئه‌یلوولی ده‌كرد.

“MBC”: جگه‌ له‌ رووی میدیاییه‌وه‌، جه‌مال عه‌بدولناسر هیچ پشتیوانیه‌كی ماددی و چه‌كی پێشكه‌ش به‌ ئێوه‌ كرد؟

سه‌رۆك بارزانی: نه‌خێر هه‌رگیز، ته‌نیا پشتگیری مه‌عنه‌وی ئێمه‌ی ده‌كرد.

“MBC”: ئه‌و پشتگیرییه‌ مه‌عنه‌وییه‌ كاریگه‌ری هه‌بوو؟

سه‌رۆك بارزانی: تا راده‌یه‌ك به‌ڵێ، به‌ڵام له‌ڕووی مه‌یدانییه‌وه‌ هیچ كاریگه‌ریەكی نه‌بوو.

“MBC”: ئه‌و كات سعوودییه‌كان چیان به‌ ئێوه‌ ده‌گوت؟ هه‌ڵوێستی ئه‌وان چی بوو؟

بارزانی: بیرم نایەتەوە هیچ رۆژێك له‌ رۆژان سعوودیه‌كان دژی ئێمه‌ وه‌ستابنه‌وه‌، به‌شێك له‌ وڵاتانی عه‌ره‌بی پشتگیری عێراقیان ده‌كرد و چه‌پڵه‌یان بۆ سه‌ركه‌وتنه‌ وه‌همییه‌كانیان لێده‌دا و بروسكه‌ی پیرۆزباییان بۆ سه‌رۆك كۆمار ده‌نارد و پشتیوانی خۆیان پیشان ده‌دا، به‌ڵام هیچ كاتێك نه‌مانبینی سعوودیه‌، هه‌ڵوێستێكی‌ دژ به‌ كورد نیشان بدات.

لە بەشێكی تری دیدارەكەی كەناڵی”MBC” بارزانی، دەڵێت:  سەدام  وتوویەتی كەركووك شارێكی كوردییە، سەرۆك بارزانی دەڵێ، سەدام حوسێن خۆی ئەمەی پێگوتم و بەو شێوەیەیش وتی كە كەركووك شارێكی كوردییە، بەڵام سەرچاوەی سەرەكی ئابوورییە بۆ دامەزراندنی دەوڵەت، من لەسەر ئەوەیش ڕەزامەند نیم.

 

بەردەوام بە لە خوێندنەوە

چاوپێکەوتن

پێریسیچ: ئامانجم بەردەوامبوونە بۆ ماوەی حەوت ساڵی تر لەنێو یاریگاکاندا

خەڵک سپۆرت – فوتباڵ ئیتاڵیا

ئیڤان پێریسیچی کرواتی ئەستێرەی نوێی یانەی بایرن میونشن چاوپێکەوتنێک لەگەڵ ماڵپەڕی “فوتباڵ ئیتاڵیا” ئەنجام دەدات، لە وەڵامەکانیدا ئاماژە بە ئاست و بارودۆخی دەرونیی لە یانە باڤارییەکە دەکات.

هەروەها دانی پێدادەنێت، کە مانەوە لە بایرن میونشن خەونێکی گەورەیە، بەڵام داهاتووی لەدەستی خۆیدا نییە.

کەشی شاری میونشن چۆنە بەلاتەوە؟ خۆت گونجاندووە؟

تائێستا هەموو شتێکی میونشن لەبەرچاوی مندا جوانە و لەڕووەکانی وەرزشیی و ژیانی تایبەتی یاریزانانەوە شارێکی ناوازەیە.

لە بایرن ئامانجی داهاتووت چییە؟

هەنگاو بە هەنگاو هەوڵدەدەم و ڕۆژ لەدوای ڕۆژ پلان دادەڕێژم، دوای ئەوەی خۆم گونجاند سەیردەکەم بزانم چی ڕوودەدات، کاتێک تەمەنت ٣٠ ساڵ دەبێت واتای ئەوە نییە گەورەبوویت و سودت نەماوە، هەست دەکەم لە بارودۆخێکی باشدام و پلانم هەیە حەوت بۆ هەشت ساڵی تر لەنێو یاریگا ئەوروپییەکاندا بەردەوامبم.

دوای پەیوەندیکردن بۆ بایرنەوە چۆن ئاستی خۆت هەڵدەسەنگێنیت؟

هەموو شتێک لە میونشن جوان و ڕێکوپێکە، لەڕیزەکانی بایرن هەست بە ئارامی دەکەم، تائێستا بارودۆخەکە لەبارە و ئەوەش لەهەموو شتێک گرنگترە.

بیر لە بەردەوامبوون دەکەیتەوە، یان گەڕانەوە بۆ ئینتەرمیلان؟

بابەتەکە لەدەستی مندا نییە، لێرە خۆشحاڵم و بیر لەهیچ شتێک ناکەمەوە تەنها بەرژەوەندییەکانی یانەی بایرن میونشن نەبێت، لێرە هەموو شتێکیان پێداوم و لەوساتەوە پەیوەندیم پێوەکردون ژیانیان پێبەخشیوم، هاندەران و یاریزانان زۆر یارمەتیدەرم بوون.

دەتوانیت ڕوونکردنەوەی زیاتر بدەیت؟

لەبارەی داهاتوومەوە نازانم چی ڕوودەدات، لەئێستادا هیچ شتێک نازانم تا پێتان بڵێم، بڕیاری کۆتایی لەدەستی ئیدارەی یانەدایە و منیش تەنها دەمەوێت تاموچێژ لە تۆپی پێ وەربگرم و بەهەموو هێزمەوە هەوڵی بردنەوە بدەم.

بەردەوام بە لە خوێندنەوە

کوردستان