ئێمە لە تۆرە کۆمەڵایەتیەکان

ناوخۆیی

(به‌وێنه‌) شاخه‌وانانی چۆمان ڕیکۆردێکی نوێیان تۆمار کرد و ٣٦٠٧ مه‌تر به‌سه‌ر چیای هه‌ڵگورددا سه‌رکه‌وتن

خه‌ڵک سپۆرت – شه‌ماڵ چۆمانی

کاتژمێر شەشی سەر لەبەیانی ڕۆژی سێشەمە و پاش ئاماده‌سازییه‌کی زۆر کۆمه‌ڵێک شاخه‌وانی به‌ ئه‌زمون لەنێو قه‌زای چۆمانه‌وه‌ بەرەو چیای هەڵگۆرد به‌ڕێکه‌وتن و توانیان ڕیکۆردێکی نوێ له‌مێژووی شاخه‌وانی کوردستاندا تۆمار بکه‌ن.

گەشتی ئەمجارەی شاخه‌وانان زیاد لە بیست شاخەوانی بە ئەزمون و بوێری لەخۆگرتبوو، سه‌ره‌تا لەکاتی دیاریکراودا و لەنێو سەنتەری قەزای چۆمان کۆبونه‌وه‌ و پاشان به‌ره‌و لوتکه‌ و ڕیکۆردی نوێ بەڕێکەوتن.

گه‌شتی ئه‌مجاره‌ ئاسان نه‌بوو، به‌ڵکو کاتژمێرێک به‌ ئوتۆمبێل ڕێیان کرد و پاشان گەشتی سه‌ره‌کی پیادەڕه‌و ده‌ستی پێکرد، یه‌که‌م هه‌نگاوی گه‌شته‌که‌ ماوه‌ی شەش کاتژمێری خایاند‌ تا گەیشتنه‌‌ خواروی ناوچه‌ی میران، لێره‌دا بۆ حه‌وانه‌وه‌ کەمپێکیان سازکرد‌ و شه‌وێکیان له‌نێو سه‌رمای کوشنده‌ و به‌فردا به‌ڕێکرد، شاخه‌وانان له‌نێو شخته‌ی به‌فر و بادا شەوێک لەسەر بەفر لەنێو خێوەتدا بەڕێده‌که‌ن تا کاتژمێر پێنجی سەر لەبەیانی، دواتر بۆ جاری دووه‌م بەڕێکه‌وتن بەرەو لوتکەی چیای هەڵگۆرد کە بەرزیەکەی ٣٦٠٧ مەترە.

گه‌نجانی شاخه‌وان کۆڵناده‌ن و پێیه‌کانیان زیاتر و زیاتر له‌سه‌ر به‌فری چیای هه‌ڵگورد جێگیر ده‌که‌ن تا کاتژمێر (١١:٠٠) به‌کاتی کوردستان ده‌گه‌ن بە لوتکەکەی ئەم چیایە، بەمەش توانیان ڕیکۆردێکی نوێ تۆمار بکەن.

هەڵگۆرد چۆمانی یەکێکه‌ لە ڕێکخەرانی گەشتەکە و له‌م باره‌یه‌وه‌ بە “خەڵک سپۆڕت”ی ڕاگەیاند :” خۆم بەخۆشحاڵ دەزانم کە توانیمان بەم سەختیە بگەینە لوتکەی چیای هەڵگۆرد، ئێمە بەردەوام دەبین و کۆڵ نادەین، ئامانجمان بره‌ودانه‌ به‌بواری شاخه‌وانی و ناساندنیه‌تی به‌ خه‌ڵکی کوردستان، له‌ داهاتوشدا هەموو هەوڵ و توانایەکی خۆمان دەخەینه‌گەڕ بۆ یارمەتیدانی زۆرترین ئه‌و که‌سانه‌ی ده‌یانه‌وێت له‌گه‌ڵ بواره‌که‌دا‌ ئاوێته‌بن‌، یارمه‌تیده‌ریان ده‌بین بۆ گەیشتنیان بۆ هەر شوێنێک کە حەزی پێدەکەن، کۆڵ نادەین وه‌ک چۆن پێشتر هه‌مان په‌یمانمان دووباره‌ کرده‌وه‌ و بەردەوامین، لەکوێدا پێویستی بەئێمە کرد لەوێ ده‌بین”.

هه‌ڵگورد چۆمانی له‌کۆتایی لێدوانه‌کانیدا به‌ خه‌مێکه‌وه‌ باس له‌وه‌ ده‌کات، که‌ تائێستا چه‌ندین کاری گه‌وره‌ و مێژووییان له‌سه‌ر ئاستی شاخه‌وانی کوردستاندا تۆمار کردووه‌، به‌ڵام له‌گه‌ڵ ئه‌وه‌شدا هیچ لایه‌نێک، ته‌نانه‌ت حکومه‌تیش پاڵپشتی نه‌کردوون، له‌کاتێکدا ئه‌وان بۆ ئه‌نجامدانی ئه‌م وه‌رزشه‌ جیهانییه هاوشێوه‌ی شاخه‌وانانی وڵاتانی تر‌ پێویستیان به‌ هاوکاری مرۆیی و ماددی ده‌بێت.

ریکلام

ناوخۆیی

هەرێم.. قەدەغەیە هاندەران لە خولەكانی وەرزش ئامادەبن

خەڵك – بەشی هەواڵ

وتەبێژی وەزارەتی تەندروستی ڕایدەگەیەنێت، ئامادەبوونی هاندەران لەخولەكانی وەرزشی هەرێمی كوردستان قەدەغەیە.

د. ئاسۆ حەوێزی وتەبێژی وەزارەتی تەندروستی هەرێم ڕایگەیاند، ئامادەبوونی هاندەران بە هەر ڕێژەیەك لە خولەكانی كوردستان ڕێگەپێدراو نییە وەك هەموو ڕێوڕەسم و كۆبوونەوەكانی تر تا ئەو كاتەی بڕیاری لەسەر دەدرێت .

وتیشی: ڕاستە ڕێژەی تووشبوون و مردن بە ڤایرۆسی كۆرۆنا لە هەرێمی كوردستان تا ڕادەیەك كەمی كردووە بە بەراورد لەگەڵ چەند هەفتەیەك لەمەوبەر، بەڵام هێشتا مەترسییەكی جددیە لەسەر ژیانی هاووڵاتیان، بۆیە داوا لە هەموولایەك دەكەین بە بەرپرسیاریەتییەوە مامەڵە لەگەڵ ئەم بارودۆخە بكەن.

بەردەوام بە لە خوێندنەوە

ناوخۆیی

یانەی شەتڕەنجی خانزاد یەکەمین چالاکی وەرزشیی خۆی ئەنجامدا

خەڵک – ئارام سەردار

پاش وەستانی چالاکیە وەرزشییەکان، بە هۆی ڤایرۆسی کۆرۆنا، بۆ زیاتر لەسێ مانگ، یانەی شەتڕەنجی خانزاد یەکەمین چالاکی وەرزشیی خۆی ئەنجامدا، کە هاوکاتە لەگەڵ 17هەمین پاڵەوانیەتی rpd نێودەوڵەتی یانەکە.

ئەگەرچی شەتڕەنج جیاوازە لەیارییە وەرزشیەکانی تر زیاتر پێویستی بەلایەنی هزر و بیری یاریزان هەیە وەک لەتوانای جەستەیی، بەڵام دوورکەوتنەوە لەڕاهێنان و پاڵەوانیەتیەکان هاوشێوەی تەواوی یاریەکانی تر، کاریگەری لەسەر ئاستی یاریزانان دەبێت.

لەپاڵەوانیەتەکەدا 41 شەتڕەنجزانی کوڕو و کچ بەجیاوازی ئاست و تەمەن بەشداریان تێداکردوە، لەنێویاندا 35 شەتڕەنجزان خاوەنی ڕیزبەندی جیهانین.

ئەنجامەکانی ئەم پاڵەوانیەتیە کە لەیەکێتی شەتڕەنجی جیهانیەوە تۆماردەکرێت، ڕاستەوخۆ کاریگەری دەبێت لەسەر ڕیزبەندی یاریزانان و یاریەکانی پاڵەوانیەتیەکەش بە سیستەمی سویسری و بە ٩ گێم بەڕێوەدەچێت، هەر شەتڕەنجزانێک 15 خولەک و 10 چرکە بۆ هەر گێمێکی لەبەردەستە، ڕکابەریەتیەکانیش بۆ ماوەی دوو ڕۆژ بەردەوام دەبن.

بەردەوام بە لە خوێندنەوە

ناوخۆیی

خەڵاتێکی گرانبەهای گڵۆباڵی بۆ ڕۆژنامەنوسانی وەرزشی کوردستان

خەڵک سپۆرت – هەرێز جەمال

رێكخراوی رۆژنامه‌نووسانی وه‌رزشی جیهان بۆ ساڵی سێیه‌م پێشبركێی باشترین كاره‌ رۆژنامه‌نووسیه‌كان ئه‌نجام ده‌دات .

به‌ پێی بڵاوكراوه‌یه‌كی رێكخراوه‌كه‌ ، بۆ ته‌واوی رۆژنامه‌نووسانی وه‌رزشی له‌ وه‌رزی ئه‌مساڵ ده‌توانن له‌ پێشبركێی چه‌ندین بابه‌تی رۆژنامه‌وانی به‌شداری بكه‌ن و كاره‌كانیان بۆ رێكخراوه‌كه‌ بنێرن وەک ، ڕاپۆرت ، ستوون ، دیکومێتناری ، دەنگ ، مۆنتاژ، بیۆگرافیا ، وێنە.

لە ڕێگەی ئەم لینکەوە دەتوانن بەشدار ببن و زانیاری ریاتر وەبگرن: لێرەدا کلیک بکە

تاوەکو 7ی مانگی 10 کارەکان بنێرن بە ژێر نووسی زمانی ئینگلیزی.

به‌ پێی بڵاوكراوه‌كه‌ پاش شۆرلیست كردن و ته‌ماشاكردنی به‌رهه‌مه‌ رۆژنامه‌وانیه‌كان له‌ مانگی ١٠ی ئه‌مساڵ ناوی سێ یه‌كه‌می ته‌واوی به‌رهه‌مه‌كان ئاشكرا ده‌كرێت، كه‌ خه‌ڵاتی یه‌كه‌م له‌ ٨٠٠٠ دۆلار ده‌بێت و خه‌ڵاته‌كانی تریش له‌ ٣٠٠٠ دۆلار ده‌بێت و تەواوی بانگهێشتکردنی کەسی سەرکەتووی ئاستی لاوانیش و بەشداریکردنی لە مەراسیمێکی گەورەی جیهانی لە ئەستۆی رێکخراو دەبێت.

بەردەوام بە لە خوێندنەوە

کوردستان