ئێمە لە تۆرە کۆمەڵایەتیەکان

ڕاپۆرت و شیکاری

چیرۆکی (کارلۆس کایزەر) ئەو یاریزانە فێڵبازەی (٢٤) ساڵی بەبێ گۆڵ و ئەسیست تێپەڕاند !

نوسینی: عیماد نوح

کارلۆس هینریکی “کایزەر” یاریزانێکی بەڕازیلی بووە، هەر لە منداڵیەوە کەسێکی زیرەک و فێڵباز بووە و لە ژیانی وەرزشییدا یاری بۆ ١٠ یانە کردووە، پەیوەندی بە هەندێک یانەوە کردووە تەنانەت یارییشی بۆ نەکردووە و بەهەر شێویەک بێت ماڵئاوایی لێکردون، بەپێی زانیارییەکانی ویکپیدیا ئەم یاریزانە نە یاری کردووە نە گۆڵ، بەڵام لە چەند ماڵپەڕێکی گەورەی ئینگلیزی ئاماژە بەوە کراوە کە تەنها بەشداری ٣٠ یاری کردووە و بەگشتی چیرۆکی ئەم یاریزانە جیاوازە…

کارلۆس کە دەبینێت وڵاتی بەڕازیل لەبواری تۆپی پێ و هونەری یاریکردندا هێندە دەوڵەمەندە، بڕیار دەدات حەزەکانی لە خەونێکی بەتاڵەوە بکاتە ڕاستی و وەک هەموو گەنجێک ببێت بە یاریزانێکی پرۆفیشناڵ و ناودار.

سەرەتا نازانێت بە چ شێوەیەک خۆی بکات بە یاریزان و بناسرێ بۆیە یەکەمین پلانی خەڵەتێنەر دەست پێدەکات، بۆ ئەم مەبەستە دەچێتە شاری ڕیۆ دی جانێرۆ و بەبێ ئەوەی لە یاریکردن بزانێت ستایشی خۆی دەکات و دەڵێت: یاریزانێکی باشم و دەتوانم مێژووی بەڕازیل بگۆرم.

سەرەتا خۆی دەکات بە هاوڕێی دوو ئەستێرەی ناودار

وەک سەرەتایەک دەیەوێت ڕەگی خۆی لەنێو یانەکان دابکوتێت و خۆی دەکات بە هاوڕێی نزیکی بیبیتۆ و رۆماریۆ، پەیوەندیە تایبەتیەکانی لەگەڵ ئەم دوو ئەستێرە ناودارە بەهێز دەکات و هەر لەڕێگەی ئەمانەوە پەیوەندی بە یانەی بوتافوگۆی بەرازیلیەوە دەکات، لە ڕۆژی ناساندنیدا و لەبەردەم هاندەراندا کاتێک دەچێتە نێو لاکێشەی سەوز پێویستە یاریی بە تۆپ بکات، بەڵام بەوپێیەی ئەزمونێکی وەهای نییە تەنها ڕادەکات و تەواوی کاتی ناساندنەکەی بەو فێڵە تەواو دەکات.

لە یەکەمین راهێنانیشدا دا بەئەنقەست خۆی بەردەداتەوە و دوو مانگ بە بیانوی پێکان دووردەکەوێتەوە، لەڕاستیدا هیچ پێکانێکی نییە، بەڵکو بە پارە ئەو پزیشکەی تایبەت بوو بە پشکنینەکان ڕێکەوتنی لەگەڵدا دەکات و داوای لێدەکات هەموو کات گوێڕایەڵی بێت و ئەوە بڵێت و بنوسێت کە بۆی دیاری دەکات، بەهۆی نەبوونی سوود لە بوتافوگۆ ئەم یاریزانە تەڵەکەبازە دەردەکرێت و پاشان پەیوەندی بە یانەی فلامینگۆوە دەکات، لە فلامینگۆدا هەر بە فێڵی پێکان بەشداری هیچ چالاکیەک ناکات و لەو یانەیەش دەردەکرێت.

کارلۆس هەموو ژیانی وەرزشی بەم فێلانە بەسەر دەبات، پەیوەندی بەهێز دەکرد لەگەڵ یاریزانەکان تاوەکو بەرگری لێبکەن بۆ ئەم مەبەستەش ئاهەنگی سازدەکرد و یاریزان و کارگێڕێ یانەکانی بانگێشت دەکرد، لە ئاهەنگەکاندا کچانی بە کرێ دەگرت و لەبەردەم یاریزانان نمایشی پێدەکردن تا تاوەکو دواتر بەرگری لێبکەن و بیپارێزن.

سێ ساڵ لە یەک یانە دەمێنێتەوە و هیچیش ناکات !

یەکێک لە سەیرو سەمەرەکانی ژیانی ئەم کەسایەتیە ئەوەیە کە سێ ساڵ لە یانەی پویبێلا دەمێنێتەوە و موچە وەردەگرێت و لە تەنها یەک یاریشدا بەشداری ناکات، بەڵام لە سێهەمین ساڵدا دەردەکرێ و وا هەست دەکات کە ئیدی کەس بە هانایەوە نایەت بۆیە پلانی دووەم دەست پێدەکات.

کارزەر دووبارە لەگەڵ بوتافوگۆ بۆند واژوو دەکاتەوە و هەڵدەستێ مۆبایلێک دەهێنێ کە لەو کاتەدا شتێکی ناوازەیە و لە رێگەی ئەم مۆبایلەوە بەشداری یاریەکان ناکات، هەرکاتێک یاری هەبێت بە فێڵی تەلەفۆنکردن خۆی دەدزێتەوە دەڵێت: نایەم کارم هەیە (هەندێک پێیان وایە ئەوەی پێیبووە مۆبایل نەبووە و بەڵکو تەنها دەستەی هونەری و کارگێڕی یانەی پێخەڵەتاندووە).

لەگەڵ یانەکان ئەم بیرۆکەیە زۆر ناخایەنێت و نزیکە ڕیسوا ببێت، بۆیە لەڕێگەی ناسینی کەسایەتیە وەرزشیە ناودارەکانی بەرازیل داوا دەکات یانەیەکی نوێی بۆ بدۆزنەوە، بەم شێوەیەش لەگەڵ یانەی یانەی فلامینگۆ بۆند واژوو دەکات، لە یەکەمین رۆژی راهێناندا راهێنان دەکات بەبێ تۆپ گوایە تازە لە پێکان گەڕاوەتەوە پاش رۆژێک لەم ڕاهێنانە ئەمجارە ڕاهێنان بە تۆپ دەکات، لەوێشدا فێڵێکیان دروست کردبوو لەگەڵ پزیشکەکەیدا و ئەمجارە دەڵێن پێکانەکەی ساڵێک دەخایەنێت، هۆکاری پێکانەکەشی ئەوەیە کە دەچێتە بەردەم گۆڵپارێزی یانە و خۆی بەردەداتەوە و دەست بەگریان دەکات و دەست لەسەر دەمارەکانی دادەنێ و هاوار دەکات: دووچاری پێکان بووم، دووچاری پێکانی قورس بووم.

یاریزانان و دەستەی ڕاهێنان و کارمەندانی یانە کە دەبینن هێندە پەرێشانە ڕاستەوخۆ دەیبەن بۆ لای پزیشک (ئەو پزیشکەی لەگەڵیدا ڕێککەوتووە) و پزیشکیش داوا دەکات بۆ ساڵێک حەوانەوەی پێبدرێت، لێرەدا پێویستە ئەوە بزانین کە ئەوکات لە بەرازیل ئامێری پێشکەوتوی هاوشێوەی سەردەمی ئێستا بونی نەبوو تا پشکنینی پزیشکی وردی بۆ بکەن، بۆیە بەردەوام فێڵ و تەڵەکەکانی سەر دەگرن و زۆرینەی کاتەکانی ژیانی بەوشێوەیە بەسەر دەبات.

ڕاهێنەر دەخەڵەتێنێت و دەڵێت: تۆ باوکمی !

لە یاریەکدا ئەوکات لە یانەی بانگۆ دەبێت بانگێشتی یارییەکان دەکرێ و ناوی لە لیستی یاریزانە بەشدارەکاندا دەبێت، کارلۆس لە ڕووبەڕوبونەوەکەدا یەدەگە و لە خولەکەکانی کۆتاییدا ڕاهێنەر داوای ئامادەبونی لێدەکات و کاتێک دەچێت مەشقەکانی خۆگەرم کردنەوە دەکات دەبینێت هاندەران وتەی ناشرین ئاڕاستەی راهێنەر دەکەن و هاوار دەکەن: پارە پەرست نازانێت بۆند بکات.

کارلۆس نایەوێت یاریی بکات و دەیەوێت بەهەر شێوەیەک بێت لەبەردەم هەزاران هاندەردا فێڵ و تەڵەکەکانی ئاشکرا نەبێت، بۆیە دەچێتە پشت سیمی یاریگا و لەگەڵ هاندەرێکدا دەستەو یەخە شەڕ دروست دەکات و ناوبژیوان ناچار دەبێت کاردی سوری پێبدات.

پاش یارییەکە ڕاهێنەر پێی دەڵێت: بۆ وات کرد؟ کارلۆسیش لێزانانە دەڵێت: خودا باوکمی لێسەندم ئەوەتا باوکێکی تری پێداوم، لەبەر خاتری تۆ خۆڕاگریم لەدەستدا و نەمتوانی بێدەنگ بم لە کاتێکدا وتەی ناشرین ئاڕاستەی باوکم دەکەن، لێرەشدا بە زۆرزانی خۆی ڕاهێنەر فریو دەدات و کارێک دەکات هەمان ئەو ڕاهێنەرە بەپەرۆشەوە بۆندەکەی بۆ نوێ بکاتەوە.

کارلۆس کایزەر گەورەترین فێڵبازە لە مێژووی تۆپی پێدا، بۆندی گەورەی لەگەڵ (١٠) یانەی وڵاتی بەرازیل واژۆ کردووە و ملیۆنان دۆلاری قازانج کردووە بەبێ ئەوەی لێدانێک ئاڕاستەی گۆڵ بکات و بگرە لە یاریی کردندا هاوشێوەی کەسێکی زۆر ئاسایی نەیتوانیوە لە مەشقەکانیشدا گۆڵ تۆمار بکات، لە کاتێکدا ڕۆژنامەوانان و ڕاهێنەرانی ئەو سەردەمەی بەوە خەڵەتاندووە کە هیچی لە ڕۆماریۆ کەمتر نییە.

لەبواری وەرزشدا چەندین وەرزشوانی ساختەچی هاوشێوەی کایزەر لە نمونەی زاریلی، بوغدوغ، علی زیای بونیان هەبووە، بەڵام هیچیان هیندەی ئەم یاریزانە بەرازیلیە نەیانتوانیوە یانە گەورەکان و کارگێڕی و ڕاهێنەران فریو بدەن.

ریکلام

ڕاپۆرت و شیکاری

باشترین ئەو ڕاهێنەرانەی بێکارن و چاوەڕێی ئۆفەری یانەیەکی گەورە دەکەن

خەڵک سپۆرت

قەیرانی کۆرۆنا بازاڕی گواستنەوەی یاریزانانی بواری تۆپی پێی لاوازکردووە، وایکردووە یانەکان زیاتر سەرقاڵبن بە کێشە داراییەکانەوە و گواستنەوەی یاریزانان و ڕاهێنەران لەبیربکەن.

هەندێک لە یانەکان بیر لە توندوتۆڵکردنەوەی پێکهاتەکانیان بە یاریزانی نوێ دەکەنەوە، هەندێکی تریشیان کێشەیان لە پڕۆژەی یانەدا بۆ دروستبووە و دەیانەوێت لەسەر ئاستی ڕاهێنەر گۆڕانکاری بکەن.

لێرەدا ناوی ئەو ڕاهێنەرانەمان بیردەکەوێتەوە، کە لەکارەکانیان دوورخراونەتەوە و حاڵی حازر بێکارن و چاوەڕوانی ئۆفەر و داواکاری یانەیەک دەکەن تا دووبارە بگەڕێنەوە نێو یاریگاکان:

  • ماوریسیۆ پۆچتینۆ: دوای دوورخستنەوەی لە پۆستی ڕاهێنانی یانەی تۆتنهام پەیوەندی بە هیچ یانەیەکی ترەوە نەکردووە، ناوبراو ڕاهێنەرێکی فەلسەفی بەتوانایە و پێکهاتەیەکی ئاگرینی بۆ یانە زەبەلاحەکەی لەندەن بونیادنا، دوو وەرز لەمەوبەر توانی بگاتە یاریی کۆتایی چامپیۆنزلیگ و نازناوەکەی بەرامبەر لیڤەرپوڵ لەدەستدا.

 

  • ماسیمیلیانۆ ئالێگری: دوای دوورخستنەوەی لە پۆستی ڕاهێنانی یانەی یوڤانتۆس، پەیوەندی بە هیچ یانەیەکی ترەوە نەکردووە، لەماوەی کارکردنی لە ئیتاڵیا توانی لەگەڵ یوڤانتۆس کۆنتڕۆڵی تەواوی خولە ناوخۆییەکان بکات، بەڵام لە خولی یانە پاڵەوانەکان نەیتوانی ئامانجەکانی بپێکێت، دووجار گەیشتە یاریی کۆتایی لە ساڵانی ٢٠١٥ و ٢٠١٧ و لەهەردوو فاینەڵەکەدا بە بەرشلۆنە و ڕیاڵ مەدرید دۆڕا.

 

  • ئێرنێستۆ ڤاڵڤێردی: دوای دوورخستنەوەی لە پۆستی ڕاهێنانی یانەی بەرشلۆنە پەیوەندی بە هیچ یانەیەکی ترەوە نەکردووە، لەماوەی ڕاهێنانی لە بارسا توانی کۆنتڕۆڵی خولە ناوخۆییەکان بکات، بەڵام بەهۆی شکستی لە خولی یانە پاڵەوانەکان لەژێر فشاری هاندەرانی یانەدا دوورخرایەوە، شێوازی ڕاهێنانی بۆ زۆرینەی یانەکانی ئیسپانیا گونجاوە.

 

  • ئارسین ڤینگەر: دوای دوورخستنەوەی لە پۆستی ڕاهێنانی یانەی ئارسیناڵ پەیوەندی بە هیچ یانەیەکی ترەوە نەکردووە، یەکێکە لە ڕاهێنەرە مێژووییەکانی خولی ئینگلتەرا و یانەی ئارسیناڵ، زۆرترین ماوە لە پۆستی ڕاهێنانی تۆپچییەکانی لەندەن بەردەوامبووە، سەرباری تەمەنە زۆرەکەی، بەڵام دوو وەرز زیاترە چاوەروانی ئۆفەری یانەیەکی گەورەیە.

 

  • ئونای ئیمیری: دوای دوورخستنەوەی لە پۆستی ڕاهێنانی یانەی ئارسیناڵ پەیوەندی بە هیچ یانەیەکی ترەوە نەکردووە، یەکێکە لە ڕاهێنەرە بەتواناکان و سەرباری شکستی لە یانەکانی پاریس سانت جێرمان و ئارسیناڵ، بەڵام لەگەڵ یانەکانی ڤالانسیا و سڤیلیە باشترین ئەنجامەکانی تۆمارکردووە، سێجار نازناوی یوروپالیگی لەسەریەک بەدەستهێناوە.

بەردەوام بە لە خوێندنەوە

ڕاپۆرت و شیکاری

کریستیانۆ دەگەڕێتەوە بۆ ڕیاڵ مەدرید؟ گواستنەوەکە مەحاڵ نییە و کێشە لەبیرکردنەوەی یاریزانەکەدایە

خەڵک سپۆرت

ماوەیەکە دەنگۆی گەڕانەوەی کریستیانۆ ڕۆناڵدۆی پورتوگالی لە یانەی یوڤانتۆسی ئیتاڵییەوە بۆ ڕیاڵ مەدریدی ئیسپانی بەهێزبووە، سەرچاوەکان پێیان وایە گەڕانەوەی ئەفسانە پرتوگالییەکە بۆ مەدرید جوڵەیەکی مەحاڵ نییە.

کریستیانۆ لە هاوینی ٢٠١٨وە یانەی ڕیاڵ مەدریدی بەجێهیشتووە و پاش چنینەوەی چەندین نازناو و دەستکەوتی بەکۆمەڵ و تاکە کەسی لەئێستادا خەون دەبینێت لە ئیتاڵیا هەمان ئەو دەستکەوتانە بچنێتەوە.

خواستی جەمسەرەکان

ڕۆژنامەی “کۆرێری دێلۆ سپۆرت”ی ئیتاڵی ئاشکرای کردووە، کە گواستنەوەی کریستیانۆ ڕۆناڵدۆ لە یانەی یوڤانتۆسەوە بۆ ڕیاڵ مەدرید مەحاڵ نییە.

چەندینجار ئادو ئاگێری ڕۆژنامەوانی مەدریدی و هاوڕێی نزیکی ئەفسانە پورتوگالییەکە ڕایگەیاندووە، کە کریس خەون دەبینێت دووبارە بگەڕێتەوە بۆ ڕیاڵ مەدرید، هەروەها کات و وادەی گواستنەوەکانی هاوینەی ٢٠٢٠ی بە گونجاو وەسفکردووە بۆ کۆتاییهێنان بەم پڕۆسەیە.

ئاگێری ڕایگەیاندووە :” هیچ شتێک لەبواری تۆپی پێدا مەحاڵ نییە، بەڵکو کریستیانۆ لە کۆتا کلاسیکۆدا بەگەڕانەوەی بۆ مەدرید پەیامێکی ئاڕاستەی ئیدارەی ڕیاڵ و هاندەرانی کرد، خەون دەبینێت بگەڕێتەوە و دۆخەکەش لەبارە بۆ ئیمزاکردنی بۆندەکەی، بەو مەرجەی یاریزانەکە و ئیدارەی ڕیاڵ ئامادەبن بۆ ئەم جوڵە مێژووییە”.

ڕووە داراییەکان

لەڕووی داراییەوە کریستیانۆ بەتەنها لەم وەرزەدا بڕی (٥٨) ملیۆن یورۆ لەڕێگەی سپۆنسەرەکانی و سپۆنسەرەکانی یانەی یوڤانتۆسەوە داهاتی هەبووە.

ئەگەر ئەم ڕێژەیەش لەگەڵ بڕی (٣٢) ملیۆنی موچەکەیدا یەکبخرێت (٩٠) ملیۆن یورۆ دەکات، ئەوەش ئەو نرخەیە کە یانەی شاهانە دەبێت پێشکەشی یاریزانەکەی بکات، یاخود زیاتر پێشکەشبکات ئەگەر بیەوێت لە چنگی یانەی یوڤانتۆس دەریبکەن.

بیرکردنەوەی کریستیانۆ

ئادو ئاگێری هاوڕێی کریستیانۆ دەڵێت :” کریستیانۆ لەو یاریزانانەیە کە لە یانەی ڕیاڵ مەدرید سەدان دەستکەوت و نازناوی بەدەستهێناوە، ئێستا دەیەوێت هەمان شت لە یوڤانتۆس دووبارە بکاتەوە، کێشەکە ئەوەیە ئەم یاریزانە لە جۆرە یاریزانانەیە کە لە نیوە ڕێگادا دەستبەرداری خەونەکانی نابێت، بەڵكو دەیگەیەنێتە ئەنجام پاشان هەنگاو دەنێت”.

بەپێی ووتەکانی ئاگێری، کریستیانۆ خەونی چنینەوەی نازناوی خولی یانە پاڵەوانەکانی ئەوروپا و خەڵاتە تاکە کەسییەکانی وەک زە بێست و بالۆن دۆرە بەدرێسی یانەی یوڤانتۆسەوە.

بۆیە قورسە بە ئاسانی و لە کۆتایی ئەم وەرزەدا بگەڕێتەوە بۆ مەدرید و لە نیوە ڕێگا یانەی یوڤانتۆس بەجێبهێڵێت.

هەروەها یانەی یوڤانتۆسیش خواستی لەسەر گواستنەوەی نییە، چونکە بەهۆیەوە سەدان ملیۆن دۆلار سودی داراییان کردووە و مەحاڵە بتوانن یاریزانێک بەو کێشە وەرزشیی و داراییەوە دابین بکەن، بۆیە چاودیڕی دۆخەکە دەکەن و لەهەر ساتێکدابێت دەرگا بەڕووی یانەی ڕیاڵ مەدرید دادەخەن.

بەردەوام بە لە خوێندنەوە

ڕاپۆرت و شیکاری

کێ توشی کۆرۆنا بووە؟ ئەو یاریزان و ڕاهێنەرانەی خراونەتە ژێر چاودێری پزیشکییەوە

خەڵک سپۆرت

ڤایرۆسی کۆرۆنا لەوڵاتی چینەوە ڕووەو کیشوەری ئەوروپا جوڵەی کردووە و ماوەی مانگێکە وڵاتانی کیشوەری پیر بەدەست ڕێژەی توشبووانەوە دەناڵێنن.

بوارە وەرزشییەکان بەتایبەت تۆپی پێ یەکێکە لەو بوارانەی زیانی بازرگانی گەورەی بەرکەوتووە، بەوپێیەی چەندین خول و پاڵەوانێتی لەترسی تەشەنەکردنی زیاتری ڤایرۆسی کۆرۆنا ڕاگیراون و تەنانەت باس لە دواخستن و هەژمارنەکردنی ئەنجامەکانی ئەم وەرزە دەکرێت.

لەهەفتەی ڕابردوو بۆ کۆتاییەکانی ئەم هەفتەیە، چەندین یاریزان و ڕاهێنەر و کەسایەتی لە یانەکانی ئەوروپا توشی ڤایرۆسە کوشندەکە بوون و چەندین یانە و یاریزانیش خراونەتە کەرەنتینەوە.

کام خولانە ڕاگیراون؟

سەرجەم خولە ئەوروپییەکان لەنمونەی چامپیۆنزلیگ و یوروپا لیگ، هەروەها خولە ناوخۆییەکانی ئینگلتەرا، ئیسپانیا، فەرەنسا، ئەڵمانیا، ئیتاڵیا پەکیانکەوتووە و ڕاگیراون.

هەندێک لە خولەکان لەنمونەی بۆندزلیگی ئەڵمانیا ئاماژە بە دەستپێکردنەوەی یارییەکان دەکەن لەسەرەتای مانگی داهاتوو، لە خولی ئیسپانیاش ماوەی دوو هەفتە دیاریکراوە و لە خولەکانی دیکەش کاتێک دیارینەکراوە.

کام یاریزانانە توشبوون؟

دانێلی ڕوگانی بەرگریکاری یانەی یوڤانتۆس، مانۆلۆ گابیادینی یاریزانی یانەی سامپدۆریا و چوار یاریزانی دیکەی ئەو یانەیە کە پێکهاتوون لە: عومەر کولی، ئالبی ئاکدال، ئانتۆنیۆ لاگۆمینا، مۆرتن تۆرسبی  لە یانەی فیورنتیناش دوسان ڤلاهۆڤیچی سڕبی توشی ڤایرۆسی کۆرۆنا بوون.

لە ئەڵمانیا سێ یاریزانی یانەی هانۆڤەر کە لە خولی پلە دوو یاریی دەکات، بەهەمان شێوە تێستەکانیان پۆزەتیڤ دەرچووە.

لە ئیسپانیا یاریزانێکی باسکەی یانەی ڕیاڵ مەدرید و مارتن ئۆرتیگای بەڕێوەبەری یانەی لیگانێس، بەڵام لە خولی ئینگلتەرا بارودۆخەکە هاوشێوەی ئیتاڵیا بەشێوەیەکی کتوپڕ قورسبوو.

مایکڵ ئارتێتا ڕاهێنەری ئارسیناڵ و هۆدسۆن ئۆدۆی یاریزانی چێڵسی و دەنگۆی توشبوونی چەندین یاریزانی دیکەش هەیە، کە لەچەند کاتژمێری داهاتوودا یەکلایی دەبێتەوە.

ئەو یانانەی چالاکییەکانیان وەستاندووە

یانەکانی لیڤەرپوڵ، ڕیاڵ مەدرید، بەرشلۆنە، فیۆرنتینا، سامپدۆریا، ئینتەرمیلان، یوڤانتۆس چالاکییەکانیان بەفەرمی وەستاندووە، نەک هەر ئەوە، بەڵکو یانەکانی ڕیاڵ مەدرید و یوڤانتۆس و ئینتەرمیلان یاریزنانیان خستۆتە کەرەنتینەوە، یانەکانی (NBA) ئەمریکاش بەهەمان شێوە چالاکییەکانیان ڕاگرت بەتایبەت دوای توشبوونی گۆبێرتی یاریزانی فەرەنسی تیمی یوتاجاز.

وەرزشەکانی تر

هەردوو جەولەی یەکەمی پێشبڕکێی جیهانی فۆرمولا ١ دواخراون، خولی یانە پیشەگەرەکانی ئەمریکاش بەهەمان شێوە بۆ ماوەی ٣٠ ڕۆژ چالاکییەکانیان وەستاندووە.

خولەکانی تێنسی سەرزەوی ئیندیانا وێلس و مەیامی و چەندین خول و پاڵەوانێتی تر لەو بوارەشدا ڕاگیراون.

بەردەوام بە لە خوێندنەوە